Galicia Ártabra Digital Noticias de Ferrol y la comarca de Ferrolterra.
O Diario Oficial de Galicia vén de publicar o anuncio polo que se formaliza a adxudicación do contrato de obra para a construción dunha nova depuradora e dunha rede de colectores no Concello de Cabanas.
Augas de Galicia adxudicou este contrato de obra hidráulica á empresa Construcións Ramón Vázquez e Reino SL, por un importe de máis de 180.000 euros, que mellorará a capacidade de saneamento de varios núcleos rurais do Concello de Cabanas e cuxas obras comezarán a mediados deste mes de maio.
A finalidade desta actuación é ofrecer un novo servizo de saneamento as vivendas que se sitúan na aldea de Lavandeira. Ademais, realizaranse as obras necesarias para posibilitar a futura conexión á rede de saneamento das vivendas dos lugares de Porcar, Piñeiros, Ameneiros, Horta e Someiro. Para conseguilo, construirase unha nova EDAR que garanta unha depuración suficiente previa a vertedura; e executarase unha rede de colectores para levar as augas residuais a esta nova depuradora. Os traballos darán servizo a máis de 120 habitantes equivalentes.
Este esforzo do Goberno galego súmase aos preto de 1,8 millóns de euros que o departamento autonómico xa ten investido en actuación hidráulicas en Cabanas desde 2009. En concreto, destináronse 1,58 millóns á dotación de abastecemento no polígono industrial de Vilar do Colo, e 200.000 euros para os lugares de Rego e Chao de Aldea.
Dende a Consellería de Medio Ambiente sinálase que este tipo de actuacións son unha mostra da firme aposta do Goberno galego a prol do abastecemento e saneamento, un compromiso que ten dado como resultado unha mellora da calidade das augas en toda Galicia.
