O Baloncesto Narón gaña ao Instituto Rosalía grazas a un gran arranque no terceiro periodo

O Baloncesto Narón superou ao Instituto Rosalía de Castro de Santiago de Compostela (74-63) grazas a un gran arranque no terceiro cuarto, no que asinaron un parcial de 14-0 que foi quen de manter practicamente ata o final do choque.

Non foi un partido doado para os pupilos de Pablo Rodríguez, que ao longo da primeira parte mantiveron un duro pulso cun combinado compostelán (32-31 no tempo de lecer) que soubo neutralizar o xogo interior dos anfitrións. Foi precisamente no arranque do terceiro tempo cando o Baloncesto Narón cimentou o seu triunfo. O cambio defensivo proposto polo preparador local descolocou o equipo santiagués e permitiu ao Narón desenvolver a faceta na que se atopa máis cómodo, isto é, a velocidade en ataque. O parcial de 14-0 reflicte perfectamente o que aconteceu nos catro primeiros minutos dese periodo, diferenza que soubo administrar ata o practicamente o final do choque, mais que, no último momento, non foi suficiente para lles arrebatar o basketaverage.

A vitoria ante un equipo co que o conxunto naronés perdera na primeira volta (93-80) supón unha inxección de moral de cara ao encontro da próxima semana na cancha do Baloncesto León, equipo que marca os postos de play-off de ascenso e ao que quere vencer para manterse perto das prazas de privilexio.

Baloncesto Narón: William Brandenberg (19), Dani García (8), Jorge Aller (5), Tim Gill (4) e Samuel Barros (10) –cinco inicial-; Thomas Stoll (24), Ezequiel Vázquez (1), Alberto Seco e Álex García (4).

Instituto Rosalía de Castro: Antón Bouzán (16), Eduardo Lada (6), Alfonso Mallo (5), Pablo Posse (3) e Jorge Fernández (4) –cinco inicial-; Nilo Barreiro (5), Álvaro Filgueira (4), Santiago Lorenzo (8), Marcos Orejas e Luis López (12).