Galicia Ártabra Digital Noticias de Ferrol y la comarca de Ferrolterra.
O Bloque Nacionalista Galego de Ferrol lamenta que o goberno local non desenvolvera ningunha iniciativa para dar cumprimento acordo plenario, presentado polo BNG no mes de abril do ano pasado, para a creación dunha empresa municipal de transporte que posibilitara que o propio Concello, tras dispor da titularidade das concesión de transporte público na nosa cidade, sexa o que preste directamente este servizo nas condicións adecuadas para o conxunto dos veciños e veciñas da cidade.
O BNG cre que este tema é unha das prioridades que debería desenvolver o goberno municipal e procurar redefinir o servizo co obxectivo de que preste un adecuado servizo, en horarios e frecuencias que cubra as necesidades sociais dos veciños e veciñas de Ferrol tanto da súa zona urbana como da rural.
«Consideramos que tras o anuncio do abandono da concesión por parte de Monbús aínda estamos a tempo daquí ao mes de agosto a desenvolver os mecanismos necesarios para que o goberno local asuma a mellora do transporte público como unha prioridade e mediante a xestión directa como se aprobou no pleno municipal» sinala o BNG nun comunicado.
O BNG considera que «a privatización dos servizos público como acontece agora co transporte remata sempre co desmantelamento dos servizos básicos para a cidadania é por isto que debamos aproveitar a actual situación na que non existen limitacións concesionais nen planificación de servizos, o que estabelece un marco totalmente aberto e sen condicionantes para que o goberno local decida libremente unha proposta de transporte público que se adecue as necesidades dos veciños e veciñas» .
