Cabanas invita a veciños e visitantes a participar na Ruta Megalítica Cabanesa

A AVV de Cabanas e Irís, en colaboración co Concello de Cabanas, organiza a Ruta Megalítica Cabanesa, unha ruta de sendeirismo coa que descubrir os diversos monumentos megalíticos do municipio. Un tramo deseñado en base ós antigos camiños existentes de planos do século XIX.

A ruta ten como punto de partida e chegada a Tafona (diante da casa consistorial) e celebrarase o 29 de xaneiro. Un total de 15 quilómetros a cubrir con dificultade media-baixa. Estímase a súa duración en catro horas e arrancará do punto sinalado ás 9 horas.

A organización destaca o carácter gratuíto da iniciativa e sinala que non é preciso inscrición previa. Recoméndase levar bastón ou pau para axudar na andada.