Narón garda un minuto de silencio polos asasinatos machistas dos últimos días

A corporación do Concello de Narón, presidida polo alcalde José Manuel Blanco e empregados municipais volveron saír hoxe á rúa para condenar os asasinatos machistas que se perpetraron nos últimos días en Vigo, Santiago de Compostela e Tarragona e que remataron coa vida de tres mulleres de 25, 30 e 44 anos, respectivamente.

Cun minuto de silencio e outro de ruído para chamar a atención dunha lacra que, segundo a concelleira de Promoción Social e Igualdade, Teresa Sabio, «segue atentando contra a integridade física e psicolóxica das mulleres», varias ducias de persoas concentráronse en repulsa dos asasinatos machistas das últimas horas

Sabio lamentou que a violencia de xénero persista e animou non só ás administracións senón tamén a toda a sociedade a pór todos os medios para a súa erradicación e a traballar especialmente entre a poboación máis nova, na que, dixo, «seguen detectándose actitudes machistas que poden desembocar no asasinato de mulleres polo simple feito de selo».