Cabanas conclúe a substitución de 70 lámpadas de alumeado público no Pudrical

O alcalde de Cabanas, Germán Castrillón, informou esta mañá do remate dos traballos de substitución de ata 70 lámpadas do alumeado público por outras LED de baixo consumo. A actuación levouse a cabo nas últimas semanas no Pudrical e, con ela, o Concello logrará un aforro enerxético e, por tanto, económico, o diminuír a factura eléctrica; optimizará o servizo e, tamén, está a aplicar unha medida respectuosa co medio ambiente.

Nesta liña, o rexidor explicou que para acometer a intervención o Concello contou coa colaboración económica doutras administracións. E, máis concretamente, indicou que as obras, orzamentadas nuns 21.000 euros, recibiron unha achega de 15.859,47 euros con cargo ó Fondo Europeo Agrícola de Desenvolvemento Rural. Fondos que xestiona o Ministerio de Agricultura, Alimentación e Medio Ambiente e máis a Xunta de Galicia e o Instituto Enerxético de Galicia (INEGA).