Continúan as reunións veciñais en Cabanas para suxerir os orzamentos de 2017

As reunións veciñais organizadas polo Concello de Cabanas nas distintas parroquias do municipio para recabar as propostas para o orzamento do 2017 continuarán mañá mércores día 2. Nesta ocasión será en Laraxe, no local social da SCRD San Mamede. A reunión dará comezo ás 20 horas e a ela están convidados todos os veciños. En primeiro lugar, avanzaranse as liñas mestras das contas e as partidas de investimento e, a continuación, abrirase o turno de palabra para que todo aquel que o desexe realice a súa proposta ou traslade a súa queixa. Así mesmo, entregaranse follas de suxestións para que os asistentes poidan trasladalas por escrito.

Nesta liña, o alcalde, Germán Castrillón, valorou moi positivamente a participación rexistrada o pasado venres na primeira das reunións, celebrada no local social de Santa Cruz, e confiou en reeditar a convocatoria mañá mércores.

Así mesmo, as xuntanzas continuarán o 7 de novembro no local social do CCRD San Martiño do Porto e, ó día seguinte, 8 de novembro, no local social de Lavandeira. Pechando as xuntanzas, a casa consistorial albergará a última reunión o día 10 de novembro. En todos os casos principiarán ás 20 horas.