O programa de difusión ciéntifica mariña «Mergúllate no Océano», en Cedeira

«Mergúllate no Océano» é un programa de difusión científica mariña da Universidade de Vigo que todos os veráns percorre as praias galegas para achegar as ciencias e tecnoloxías mariñas a todas as persoas interesadas, sen ter en conta a idade nin o nivel formativo.

A vila de Cedeira, máis concretamente o areal da Madalena, acollerá dita iniciativa os días 30 e 31 do presente mes. «Mergúllate no océano» consiste nun percorrido de oito obradoiros que a través de experimentos sinxelos, simulacións e xogos permiten ao participante atopar curiosidades sobre os nosos mares e océanos, obter coñecementos específicos que teñan relación coa investigación que se realiza nas universidades e centros que forman o Campus do Mar, e por suposto aprender a levar un estilo de vida más sostible co medio mariño.

Os obradoiros están dirixidos por profesionais con titulación superior universitaria e dilatada experiencia na transmisión de coñecementos a través de accións de divulgación da ciencia, contratados para tal fin tras superar un proceso selectivo.

O programa tamén consta dunha mostra duns 200 metros cadrados que estará aberta ao público ininterrompidamente entre as 11.00 e as 20.30 horas.

Más de 1.500 persoas xa levan participado nas dúas xornadas que o programa estivo na praia de Samil.