Cedeira traballa coa Consellería de Política Social de cara á ampliación da Escola Infantil

O alcalde de Cedeira, Pablo Moreda Gil, mostrouse satisfeito da reunión mantida na mañá deste luns en Santiago co conselleiro de Política Social, José Manuel Rey Varela, e o xerente do Consorcio Galego de Servizos de Igualdade e Benestar, Perfecto Rodríguez Muíño, a que acudiu acompañado da edil de Servizos Sociais, Manuela López. Dúas foron as cuestións que focalizaron a reunión. Por unha banda, a necesidade de ampliar a escola infantil e por outra o incremento do número de traballadoras sociais para mellorar o servizo.

O alcalde de Cedeira arrincou como primeiro compromiso realizar unha memoria valorada sobre a posibilidade de aumentar ata duplicar os espazos actuais da gardería para contemplar a ampliación a cociña e dispoñer dunha nova sala de xuntas e tamén de almacéns. Dita reforma require a ocupación dun edificio contiguo ao actual e tamén de carácter público.

Como punto de partida, o Concello comezará a traballar case de maneira inmediata na elaboración do documento para saber o custo das obras. «O obxectivo é coñecer as cifras reais», tal e como apuntou o alcalde. Moreda explicou que «se trata dunha necesidade pero aínda que sexa así non vamos traballar sobre unha utopia». O alcalde manisfestou a súa intención de reunirse xa nos próximos días con persoal da oficina técnica para comezar a traballar no diagnóstico.

Posteriormente, Moreda Gil manterá un novo encontro cos responsables da Xunta en materia de Benestar para coñecer o compromiso económico que poderían asumir cada unha das partes implicadas no proxecto. O Concello invertirá este ano uns 20.000 euros en obras de mellora na gardería, unha colaboración que Rey Varela agradeceu expresamente ao alcalde. A matrícula actual do centro ronda os 60 rapaces menores de tres anos. «A demanda de prazas segue crecendo», sinalou o alcalde.

O segundo tema foi a posible ampliación da plantel de traballadoras sociais. O conselleiro avanzou a posibilidade de cubrir unha media xornada e tamén a de crear unha praza máis. O alcalde valorou esta boa disposición do titular de Política Social xa que, desta forma, o Concello tamén podería ofrecer máis horas de servizos.