Galicia Ártabra Digital Noticias de Ferrol y la comarca de Ferrolterra.
O lucense José Manuel Fernández, co seu can Pirulo, foi o vencedor do XXI Campionato Galego de Cans de Rastro Atraelados sobre Xabaril, disputado o pasado sábado no Concello de Cabanas.
Os máis de 30 monteiros clasificados nos seus campionatos provinciais, Copa Galicia e o campión da edición anterior, achegáronse ao municipio para desfrutar dun campionato organizado pola Federación Galega de Caza coa colaboración da Sociedade de Cazadores de «O Castro de Cabanas» e o Concello.
Foi o monteiro de Lugo José Manuel Fernández Fernández co seu can Pirulo o que chegou a Cabanas como actual campión provincial da modalidade, e a súa participación non defraudou, quedando primeiro no seu campo na fase clasificatoria e primeiro na fase final cun total de 240,5 puntos, converténdose no novo Campión Galego de Cans de Rastro Atraelados sobre Xabaril. O vixente campión de España da modalidade, Francisco Rodeiro Eiras, acadaba o subcampionato e medalla de prata co seu can Rato cun total de 229,0 puntos.
O monteiro José Manuel Barreiro Rivadas, de A Coruña, realizou unha participación que o colocaba en terceira posición da clasificación final coa súa cadela Brisa con 192,5 puntos. A estes tres primeiros clasificados súmanselles os monteiros Luis Iglesias, Salvador Sestelo, Francisco Romero e Manuel Rodeiro completando así a Selección Galega que representará á comunidade no vindeiro nacional da especialidade.
Organización, autoridades, xuíces, participantes e público compartiron no pavillón de Lavandeira un xantar, que tivo a súa guinda na entrega de premios aos primeiros clasificados.
