O pemento do Couto percorrerá o norte de España a través dunha «food truck»

O Concello de Narón continúa impulsando iniciativas encamiñadas a promocionar o pemento do Couto, un produto que se cultiva ademais de na localidade en varios concellos da comarca e cuxo Regulamento de Indicación Xeográfica Protexida (IXP) aprobou a Consellería de Medio Rural no ano 2010. Unha nova proposta gastronómica que contempla a promoción desta variedade de pemento nunha food truck –chamada “La Carnioneta”, dun empresario naronés, Bruno Casal-, polo norte de España, contará co respaldo do Concello.

Así o indicou a edil de Feiras e Mercados, Mar Gómez, que anunciou que a presentación desta nova food truck terá lugar este domingo, día 17, ás 12:30 horas, nun acto que se desenvolverá nas inmediacións da cervexería El Mercado (estrada de Castela, 120), no Alto do Castiñeiro, e que incluirá degustacións e un apartado musical.

A edil naronesa explicou que «unha vez que comece a campaña do pemento do Couto, nesta food truck poderán degustarse, xunto con outras especialidades culinarias, en diferentes concellos galegos e doutras comunidades autónomas do norte de España a través desta proposta». Ao acto de presentación acudirán, ademais da edil naronesa, representantes da Asociación de Veciños do Couto, da cooperativa do Val e da Orde de Damas e Cabaleiros do Pemento do Couto.

«A intención do goberno local é continuar apostando pola promoción do pemento do Couto, un produto cun distintivo de tanta relevancia como é unha IXP, que segue uns controis moi específicos en materia de calidade, e cada día máis coñecido fóra de Galicia, pero que consideramos que é preciso continuar promocionando para colaborar deste xeito tanto cos produtores como cos comercializadores que hai no municipio de Narón e tamén noutros desta comarca», subliñou Mar Gómez.