O BNG lamenta que o Goberno de Suárez asuma o convenio co Defensa do pasado mandato do PP

Dende o Bloque Nacionalista Galego de Ferrol han sinalado que «lamentamos que as negociacións do acalde da cidade, Jorge Suárez, co Ministerio de Defensa en ningún caso cuestionen o feito de que o goberno local teña que pagar polas propiedades incluídas no convenio con Defensa, unha decisión que o propio alcalde tiña censurado e criticado antes de chegar ao cargo por tratase dunhas propiedades que orixinariamente pertencían aos veciños e veciñas da cidade».

Para os nacionalistas o alcalde volve «unha vez máis a comportarse como facía o anterior goberno municipal, asumindo o mesmo discurso que tiña o Partido Popular de que esta cidade non pode esperar máis por este convenio sen ter un plan para o seu desenvolvemento e asumindo o pago por estas propiedades sen que en ningún momento se lle pasara pola cabeza rachar con esta dinámica prexudicial para coa nosa cidade e cuestionar un convenio que supón o asalto as arcas municipais consentido polo goberno local, pagando por propiedades que deberían revertir de modo gratuíto nos seus lexítimos propietarios como son os veciños e veciñas da cidade», lamentaron dende o Bloque Nacionalista. «Deste modo dende o goberno da cidade non só non se pretende solicitar a devolución dos 120.000€ adiantados polo PP, que non supuxeron a adquisición de ningún dereito por parte do Concello, senón que se pretende facer efectivos os 460.000€ restantes sen que sinta ningún tipo de rubor», sinalaron.

Así mesmo, o BNG considera que o goberno local debería esixirlle ao Ministerio de Defensa e ao resto de administracións con propiedades abandonadas no Concello de Ferrol que atendan as súas obrigas de conservación dos inmobles e parcelas da súa propiedade que permanecen no máis absoluto abandono, «como é o caso do Sánchez Aguilera e o resto de propiedades incluídas neste convenio», indicaron.

«Dende o BNG lembramos que a decisión sobre os usos do Sánchez Aguilera e a posibilidade de frear os seus usos especulativos, incluíndo o espazo reservado para a construción dunha nova macro-área comercial e o cambio de uso da estación radio de Mandiá é unha decisión de competencia municipal. É por isto que reclamamos que o urbanismo da cidade debe estar sometido as necesidades dos veciños e veciñas e non aos intereses doutras administracións como acontecía no anterior mandato e continúa a acontecer no actual», apuntaron os nacionalistas.