Galicia Ártabra Noticias de Ferrol y la comarca de Ferrolterra.
A Feira do Cocido de Lalín, unha das principais festas gastronómicas de Galicia e Festa de Interese Turístico Nacional desde o 2010, desembarca este venres en Ferrol en forma de camión gastronómico -ou food truck como se deron en chamar estes vehículos- dentro dunha xira promocional do Mes do Cocido polas principais cidades e vilas galegas.
Este food truck fará a súa terceira parada galega no Concello de Ferrol, logo de saír de Lalín e deterse en Lugo. Estará estacionado durante toda a xornada -de 10:30 a 19:00- nun lateral da Praza de Armas, coas portas abertas a veciñanza para desgustar algúns dos manxares mais típicos de Galicia, e desta época do ano, como o lacón con grelos.
O cocido sae dos fogóns dos novos valores da cociña de Lalín que están a reinventar o prato mais típico da nosa gastronomía cos aires e a presentación que lle da a modernidade culinaria. É unha iniciativa da Alcaldía de Lalín, que chega este vernes a Ferrol co fin de potenciar o sector da hostalaría e a restauración local mediante unha campaña de márketing e publicidade específica, que se desenvolve desde o 15 de xaneiro ata o 14 de febreiro facendo bo o lema “De San Amaro a San Valentín, Mes do Cocido en Lalín”.
A parada en Ferrol do ‘food truck’ de Lalín conta coa colaboración do Concello e da Policía Local da cidade. O pregón da edición número 48 da Feira do Cocido será o domingo 31 de xaneiro, na capital do Deza a cargo do xornalista Manuel Jabois.
Ademais da xira promocional no bus do cocido polas cidades de Galicia e Norte de Portugal, a 48 edición da Feira de Lalín, vense de reforzar cun novo portal web: feiradococido.lalin.gal.
