Galicia Ártabra Digital Noticias de Ferrol y la comarca de Ferrolterra.
O Grupo Municipal Socialista, a través do seu concelleiro Jaime Pena, insta ao alcalde a que asuma o compromiso plenario relativo a San Xoán-Bertón, acadado en outubro do ano pasado, e tome as medidas necesarias para solucionar as deficiencias máis urxentes detectadas no barrio.
Así, os e as socialistas súmanse e solidarízanse coas demandas dos veciños e veciñas do barrio, lembrando a necesidade de solucionar un conxunto de problemas detectados no barrio de San Xoán-Bertón, algunhas disfuncións e a falta de cobertura dalgúns servizos básicos, dende ausencia de beirarrúas en estradas con tránsito preto de colexios, ata a súa non inclusión na política descentralizadora dos contidos socioculturais.
Por todo elo, o Grupo Municipal Socialista propuxo diversas medidas na devandita moción, que acadou o acordo de toda a corporación municipal, sendo estas o proceder á dotación dunha caldeira para o local social conveniado coa deputación da Coruña e arranxar os problemas de ausencia de ventilación do mesmo; dinamizar o local social do barrio organizando actividades socio-culturais no mesmo; remodelación do parque infantil anexo a asociación de veciños; arranxo dos perigosos baches da rúa Basanta e terminación das beirarrúas; beirarrúas do Espiño; supresión do tapón da rúa Río Xubia confluencia Manuel Belando; finalización da urbanización da Rúa Campo de Chao; e remodelación da Praza Rosalía de Castro. Ao que temos que engadir as últimas denuncias da Asociación de veciños sobre o mal estado no que se atopan diversas rúas e camiños, como Souto, Espiño, Basanta, Campo de Chao, Carricoa o Río do Toxo, entre outros.
