Galicia Ártabra Digital Noticias de Ferrol y la comarca de Ferrolterra.
O presidente da Deputación, Diego Calvo, asinou na tarde deste martes, día 4, xunto ao alcalde de Ortigueira, Rafael Girón, un convenio que pon de manifesto o compromiso da institución provincial co Festival Internacional do Mundo Celta que se celebra na vila.
Este ano, cando se cumpre a XXIX edición deste encontro musical, a Deputación aposta de novo pola colaboración co festival achegando unha axuda de 80.000 euros, o maior patrocinio que recibe o evento, para contribuír aos gastos de organización, que suman un total de 300.000 euros.
En concreto, o apoio da Deputación irá destinado a sufragar parte dos gastos das actuacións musicais e contratacións artísticas; o aluguer de infraestruturas; os gastos de aloxamento e manutención; a publicidade e promoción do evento; o traballo de Protección Civil e a seguridade privade; os servizos xerais e infraestruturas; ou os servizos de prensa, vídeos oficiais ou servizos externos.
Tras a firma do convenio, o alcalde Rafael Girón agradeceu o apoio económico da Deputación á celebración do mítico festival, xa que, segundo dixo, “sigue a ser o grande referente da nosa vila e poder mantelo, con entrada gratis para todos os que queiran asistir, é moi importante para nós”.
Pola súa banda, Diego Calvo salientou o feito de que “estamos a apoiar un festival de música moi importante pero, sobre todo, estamos ante un dos grandes acontecementos culturais e turísticos da provincia”. Asegurou ademais que o Festival Internacional do Mundo Celta chega a todos os recunchos do planeta, xa que “creo que a estas alturas xa ninguén dubida do reclamo que supón para amantes do folk de todo o mundo”.
