Galicia Ártabra Noticias de Ferrol y la comarca de Ferrolterra.
O Concello de Neda proxecta este venres, no marco do seu ciclo de cinema documental, “Ao son da nova regueifa”. Un proxecto audiovisual que pon en valor esta tradición oral galega en verso na que a ironía é protagonista, que chega á vila da man do “Outono das artes” da Deputación da Coruña”.
O filme, que se poderá ver na Casa da Cultura, a partir das 20:30 horas, conta con guión e dirección de Manolo Maseda e Saúl Rivas, percorre Galicia para descubrir como a regueifa, continúa viva e reinventándose no presente.
Así, segundo explican dende a entidade provincial, “a través das voces de regueifeiras e regueifeiros de diferentes xeracións e territorios, a película amosa como esta arte da improvisación conecta tradición e creación contemporánea”.
O documental, que debuxa o retrato desta practica, concibida como unha disputa dialéctica improvisada e en verso, vai destinado ao conxunto da veciñanza, e está especialmente recomendado para persoas interesadas na cultura popular, e na tradición oral.
O documental coincide no tempo coa conmemoración, por parte do Concello do Día do orgullo neofalante, que contempla, entre outras propostas, o espectáculo “Quen inventou o rap?” cunha das regueifeiras máis populares da actualidade, Lupe Blanco.
