O grupo municipal socialista pide que se xestionen axudas do goberno para a rehabilitación de San Felipe

O Grupo Municipal Socialista pídelle ao goberno local que xestione co goberno estatal a continuidade da liña de axudas para a rehabilitación do Castelo de San Felipe.

Os socialistas lembran que o Castelo de San Felipe pertence ao patrimonio do Concello de Ferrol, e é unha infraestrutura que ven sendo visitada por 25.000 persoas ao ano, concentrándose a maior parte nos meses de xullo e agosto.

O Grupo Municipal Socialista lembra tamén que no mandato anterior, o goberno socialista xestionou co  ministerio de cultura, os fondos necesarios ara a labor de rehabilitación deste patrimonio ferrolá, pola cuantía de 300.000 euros anuais. Deste xeito, acadouse a rehabilitación no interior do castelo, da Casa do Gobernador.

Para o Grupo Municipal Socialista parece lóxico que se continúe coa rehabilitación, xa que son máis que necesarios as labores de mantemento, e denuncian o actual estado de abandono no que se atopa o castelo, e que afecta non so ás edificacións, senón tamén ao entorno cheo de maleza e lixo. Outras das melloras no mandato anterior foi a inclusión do Castelo no contrato de xardíns, que permitía unha limpeza das instalacións, e o coidado do entorno, que todo indica que agora  mesmo non se leva a cabo.

Outra das demandas dos socialistas na comisión foi a de poñer en valor o Arquivo Municipal, que atópase nunhas condicións moi deficientes, desperdigado pola parte superior e inferior do concello e exposto as humidades que poñen en perigo a conservación dos mesmos e aceleran o seu deterioro. Para o Grupo Municipal Socialista é unha prioridade que por parte do goberno municipal se aceleren as xestións para atopar unha nova ubicación axeitada para unha correcta conservación.