Galicia Ártabra Noticias de Ferrol y la comarca de Ferrolterra.
O director de Turismo de Galicia, Xosé Merelles, reuniuse co presidente da agrupación artística Meninas de Canido, Eduardo Hermida, no marco do apoio económico de 36.000 euros da Xunta de Galicia a esta cita, que terá lugar do 4 ao 6 de setembro.
Durante o encontro destacaron a importancia de manter este tipo de colaboracións, fundamentais para a continuidade deste festival que alcanza xa a súa 18ª edición e que se encontra plenamente consolidado nos circuítos de arte urbana.
O director de Turismo de Galicia puxo en valor, ademais, a contribución de Meninas de Canido á proxección turística de Ferrol cunha “programación chea de propostas para todos os públicos, con concertos e actividades deportivas e gastronómicas que completan unha fin de semana na que a cultura será a gran protagonista”. Neste sentido, salientou o bo momento que está a vivir Ferrol como destino e a importancia deste tipo de iniciativas para dar a coñecer o territorio.
No primeiro semestre do ano, a cidade rexistrou 47.461 viaxeiros, máis dun 40% máis que no mesmo período do 2025. Destaca especialmente o crecemento do turismo internacional, cun aumento do 75% no número de viaxeiros estranxeiros.
