Galicia Ártabra Noticias de Ferrol y la comarca de Ferrolterra.
A Asociación Restauración de Os Casás organiza, coa colaboración do Concello de Cerdido, a 16ª edición da Malla Tradicional de Os Casás, que terá lugar este sábado 29 de agosto. Este evento festivo e etnográfico ten como obxectivo principal manter viva a memoria do rural e poñer en valor os oficios tradicionais que forman parte do patrimonio cultural do municipio.
A programación arranca ás 11:00 horas coa recreación da malla tradicional, onde os asistentes poderán presenciar de primeira man como se realizaban estes traballos do campo de xeito artesanal. Ao remate do labor, ás 14:00 horas, dará comezo a sesión vermú amenizada polo grupo Jalisco, que poñerá o ritmo musical antes do xantar.
Ás 15:00 horas celebrarase a tradicional comida popular, cuxo menú inclúe entremeses, empanada, churrasco, bebida, sobremesa e café por un prezo de 26 euros por persoa.
A celebración continuará durante toda a tarde e a noite cunha intensa xornada de festa rachada, novamente coa animación musical de Jalisco, garantindo o bo ambiente e o baile para todos os asistentes ata o peche da xornada.
