Prazo aberto en Valdoviño para que as escolas de surf presenten a súa oferta de turismo activo

Concederánse un máximo de 15 autorizacións en todos os areais agás Campelo, reservado para a práctica do surf libre.

Tras a súa aprobación no pleno extraordinario celebrado en marzo, o Diario Oficial de Galicia publicou o anuncio das bases que rexerán o proceso para a concesión de permisos de actividade das escolas de surf e disciplinas afíns nas praias de Valdoviño.

A partir deste xoves 2 de abril, ábrese un prazo de 10 días naturais para que as escolas interesadas en desenvolver os seus programas de turismo activo no municipio poidan presentar a correspondente solicitude a través da sede electrónica e rexistro municipal da casa consistorial.

As citadas bases establecen un tope máximo de 15 autorizacións en todas as praias, agás Campelo, que se reserva para a práctica do surf libre. É unha das principais novidades respecto á normativa anterior, que fixaba un número máximo de 8 no caso da praia de Pantín. Así mesmo, os permisos concederanse para toda a tempada (os 12 meses do ano), cunha vixencia anual con posibilidade de 3 prórrogas.

As autorizacións tramitaranse a través dun proceso aberto en réxime de concorrencia competitiva, e entre os criterios a valorar están: o plan de explotación, calidade e interese público da proposta, con 30 puntos; o arraigo con 25; a cualificación do persoal, as medidas de seguridade e emerxencias e as medidas ambientais e de protección do litoral, cada un con 15 puntos. Así mesmo, mantense o requisito de promover accións de carácter educativo, cultural, social ou medio ambiental en beneficio da comunidade.

O pasado 25 de febreiro, a Consellería de Medio Ambiente informaba favorablemente á petición do Concello de asumir a competencia no tocante ás autorizacións para a ocupación e utilización dos terreos e bens de dominio público marítimo-terrestre mediante as instalacións e actividades descritas no plan municipal de explotación dos servizos de tempada. Unha condición imprescindible despois de que o Goberno central traspasase ao autonómico as funcións e servizos en materia de ordenación e xestión do litoral.

En todo caso, e co visto bo da Xunta, a situación manterase en Valdoviño, xa que a Administración local era a encargada das autorizacións.

Enlace ás bases: https://acortar.link/7ktIUQ