Galicia Ártabra Digital Noticias de Ferrol y la comarca de Ferrolterra.
O novo vehículo mellora a calidade do servizo de transporte que ofrece AFAL ás persoas usuarias do seu centro de día.
O presidente da Deputación da Coruña, Valentín González Formoso, visitou este martes as instalacións da Asociación de familias de enfermos de alzheimer e outras demencias (AFAL Ferrolterra). O motivo da visita do presidente provincial á entidade foi a entrega dun vehículo de 9 prazas adaptado a persoas con mobilidade reducida, que axudará a AFAL ao transporte dos usuarios e usuarias do centro de día que xestiona.
O vehículo (unha Renault Master) supuxo un investimento de 55.000 euros e cubre unha das principais necesidades da asociación, que xa realizou unha petición idéntica no 2023, pero que agora, visto o incremento da demanda na prestación do servizo, volve realizar para seguir ofrecendo a maior calidade e comodidade ás persoas usuarias do seu centro de día.
Despois da entrega, Formoso, acompañado pola deputada de Política Social, Mar García Vidal, o presidente de AFAL, Carlos López, o vicepresidente e xerente, José Otero, a secretaria, Susana González, e a directora asistencial, Noelia Ríos, visitou o centro de día que a entidade ten na cidade de Ferrol. Neste espazo, a asociación presta atención a persoas con patoloxías de deterioro cognitivo, e Formoso puido coñecer de primeira man como funcionan as actividades e obradoiros de memoria que serven para retrasar os efectos das enfermidades que padecen as persoas usuarias do centro.
O presidente provincial destacou que “o apoio fundamental que AFAL supón para as persoas con Alzheimer e as súas familias” e lembrou que, na última década, na institución provincial “vimos colaborando cada ano con AFAL en adquisicións de vehículos como o que hoxe entregamos, pero tamén no desenvolvemento das actividades do seu centro de día e na mellora das súas instalacións”.
Pola súa banda, os representantes de AFAL agradeceron ao presidente da Deputación a súa implicación constante coas necesidades da entidade.
