Galicia Ártabra Digital Noticias de Ferrol y la comarca de Ferrolterra.
O Concello de Narón, a través da Oficina de Transformación Comunitaria (OTC), organiza dúas novas sesións formativas abertas á veciñanza que se celebrarán os días 29 e 30 de decembro no Auditorio Municipal de Narón, centradas na creación de comunidades enerxéticas locais e no acceso ás axudas públicas en materia de enerxía e rehabilitación.
A primeira das formacións terá lugar o próximo luns 29 de decembro ás 12.00 horas baixo o título “Presentación de Narón en Comunidade: unha comunidade enerxética para o aforro e a independencia enerxética”, que incluirá tamén contidos sobre modelos xurídicos das comunidades enerxéticas. A sesión servirá para presentar o proxecto municipal “Narón en Comunidade”, unha iniciativa destinada a impulsar comunidades enerxéticas locais como ferramenta para reducir a factura eléctrica e avanzar cara a unha maior autonomía enerxética.
Esta formación está dirixida á veciñanza en xeral e tamén a asociacións veciñais, pequenos comercios, comunidades de montes, colectivos sociais e comunidades de propietarios interesadas neste modelo. Durante a xornada explicarase que é unha comunidade enerxética, en que se diferencia doutras fórmulas tradicionais, que modelos de participación existen e como funciona na práctica o reparto da enerxía nunha instalación fotovoltaica compartida.
Ademais, detallarase como se vai desenvolver o proxecto no municipio, que perfís poden participar e cales serán os primeiros pasos do proceso. A sesión pecharase cunha quenda de preguntas para resolver dúbidas concretas das persoas asistentes. A segunda cita será o martes 30 de decembro ás 20.00 horas, tamén no Auditorio Municipal, coa formación “Como acceder ás axudas públicas: guía práctica para veciñanza e entidades”.
Esta sesión está orientada tanto ao público xeral como a representantes de asociacións, comunidades de montes, ANPAS, clubs e outras entidades locais. Durante a formación abordarase de maneira práctica que tipos de axudas públicas existen en materia de autoconsumo fotovoltaico, eficiencia enerxética e rehabilitación, onde se publican as convocatorias e que aspectos clave é preciso revisar antes de solicitalas. Tamén se detallarán os requisitos máis comúns que adoita esixir a administración e ofreceranse recomendacións para preparar a documentación con antelación e evitar erros que poidan supoñer a perda das axudas. Ao remate habilitarase unha quenda de preguntas para atender casos concretos.
Con estas dúas novas formacións, o Concello de Narón continúa reforzando o seu compromiso cun modelo enerxético máis sostible, participativo e accesible, facilitando información e acompañamento á cidadanía para reducir custos e aproveitar as oportunidades existentes.
A Oficina de Transformación Comunitaria, situada no Centro Social A Solaina, atende de luns a venres en horario de 09.00 a 15.00 horas (atención presencial os martes e mércores). As persoas interesadas poden contactar no teléfono 677 73 73 21 ou no correo electrónico otc@naron.gal.
As actividades da Oficina da Enerxía están cofinanciadas con fondos da Unión Europea – NextGenerationEU, no marco do Plan de Recuperación, Transformación y Resiliencia do Ministerio para a Transición Ecolóxica e o Reto Demográfico.
