Galicia Ártabra Digital Noticias de Ferrol y la comarca de Ferrolterra.
Tras o éxito e a excelente acollida da súa primeira edición, CITES FERROL, grazas á axuda de promoción económica do Concello de Ferrol, pon en marcha a II Edición do Concurso de Escaparate Comercial de Nadal da cidade.
A iniciativa, que o ano pasado contou cunha ampla participación e moi boa valoración por parte do público e dos comerciantes, busca continuar impulsando a creatividade dos establecementos durante unha das épocas máis especiais do ano. O obxectivo é conseguir escaparates atractivos e innovadores que capturen a atención tanto dos ferroláns e ferrolás como dos visitantes que se achegan á cidade no Nadal.
Nesta segunda edición, o igual que na primeira non é necesaria inscrición previa: todos os comercios que decoren os seus escaparates con espírito navideño serán automaticamente considerados posibles gañadores.
As bases poden consultarse na web e nas redes sociais de Cites Ferrol (@citesferrol). O premio consistirá nun diploma e 200 euros en vales de desconto de 5 euros, para repartir entre os clientes e aplicar nas súas compras no establecemento ata o 20/01/2026.
A organización realizará a súa selección, pero o público volverá ter un papel destacado. Poderá subir ás súas redes sociais unha foto do seu escaparate favorito de Ferrol co hashtag #escaparateferrol2025. Se a imaxe coincide co escaparate elixido polo xurado, a persoa participante recibirá un vale de 20 euros para utilizar no comercio gañador.
O veredicto do xurado comunicarase ao establecemento o día 28 de decembro e será difundido nos medios e nas redes sociais de CITES. A entrega do premio terá lugar no propio comercio antes do día 31 de decembro. A persoa gañadora do voto do público será informada mediante mensaxe privada a través da súa rede social.
