A ASF súmase ó Día Mundial da Terapia Ocupacional que se celebra este lúns 27

A terapia ocupacional é unha disciplina que busca obter a mellor condición de saúde e de benestar na poboación, e instrumentaliza a súa intervención na ocupación do ser humano. Ademais, canto maior sexa a identidade profesional dun colectivo, maior será a calidade do proceso de intervención ofrecido. Esta profesión celebra este lúns o seu Día Mundial, e un dos terapeutas ocupacionais da Área, Miguel Ángel Talavera Valverde, quere pór o aceno no manifesto da profesión.

A terapia ocupacional na atención hospitalaria e no ámbito comunitario intervén por medio dun traballo grupal ou individual, virtual ou presencial coa ocupación e as actividades cotiás das persoas. Así, promóvese, prevese, modifícase, restáurase, mantense ou establécese o seu desempeño. Estes profesionais facilitan que as persoas poidan manter a súa actividade cotiá, e lograr unha mellor condición de saúde e sensación de benestar. 

Na Área Sanitaria de Ferrol-ASF, traballan un total seis terapeutas ocupacionais, entre os ámbitos da  Saúde de Mental, da Medicina Física e Rehabilitación, e na Rede Galega de Promoción da Saúde (Regaps Ferrol). 

Disciplina que acompaña

Ángel Talavera, que vén de ser nomeado hai semanas presidente do Comité de Ética e da Investigación e a Docencia da Universidade de A Coruña, pon o aceno no manifesto da profesión no día Mundial. A terapia ocupacional é unha profesión sanitaria incluída na Lei de Ordenación de Profesións Sanitarias, e é unha “disciplina que acompaña a persoas, poboacións, comunidades e organizacións na promoción, prevención, desenvolvemento, recuperación e mantemento do seu desempeño ocupacional”. 

O seu exercicio profesional permite estudar as actividades significativas da persoa ou poboación, realizar unha adecuada prescrición ocupacional e adaptar actividades e contornas, propiciando a máis adecuada condición de saúde. Facilita que as persoas vivan, traballen e participen plenamente nas súas contornas. Xunto con isto, enfócase en fomentar a autonomía, o equilibrio e a sensación de competencia ocupacional, así como a calidade de vida, a través de actividades significativas que consideran o contexto persoal, social e cultural de cada individuo. 

Ademais, busca xerar xustiza ocupacional, evitando situacións de marxinación, alienación e de privación ocupacional. O seu obxectivo, en definitiva, “é apoiar ás persoas para que poidan desempeñar as actividades que son importantes para elas, adaptándose ás súas necesidades e promovendo a súa inclusión en todas as áreas da ocupación”.

O Día Mundial da Terapia Ocupacional que se celebra hoxe día 27 de outubro é unha excelente oportunidade para “animar a todos os axentes implicados a buscar sinerxias.  Traballar xuntos para incorporar e reforzar a presenza da terapia ocupacional permitirá dar resposta ás demandas crecentes dun sistema sanitario, social e educativo cambiante, sen perder o enfoque na ocupación, que é o que dá sentido á vida das persoas”, remata o manifesto.