Galicia Ártabra Digital Noticias de Ferrol y la comarca de Ferrolterra.
O concelleiro de Deportes de Narón, Ibán Santalla, e o presidente do Club Tenis de Mesa Narón, Fernando Montero, presentaron a vixésimo oitava edición do Campionato galego benxamín, a vixésimo oitava infantil, a trixésimo terceira sub 23 e e a trixésimo terceira veterana dobres de tenis de mesa, que se celebrará esta fin de semana, os días 11 e 12 de outubro, no pavillón Campo da Serra.
Os deportistas xogarán en dez mesas ao mesmo tempo, en horario de mañá e tarde nas dúas xornadas, de 10:00 a 14:00 e dende as 15:00 ata as 19:00 horas. “Esta é a primeira vez que se fai un campionato de dobres en solitario, polo que se verá como resulta con respecto a como se estaba facendo anteriormente”, apuntou Montero.
O presidente do club local indicou que este é o primeiro campionato galego da tempada e agradeceu a colaboración do Concello de Narón pola cesión das instalacións deportivas nas que se desenvolverá. Unha trintena de deportistas do Tenis de Mesa Narón participarán na convocatoria.
O edil de Deportes, Ibán Santalla, destacou tamén o traballo que leva a cabo o club e a súa dilatada traxectoria no tenis de mesa. Valorou o feito de que se programasen na cidade estes campionatos autonómicos e animou á cidadanía a acudir á cita para animar aos participantes.
