Galicia Ártabra Digital Noticias de Ferrol y la comarca de Ferrolterra.
O xoves 2 de outubro celebrouse unha reunión convocada pola concelleira de Benestar Social, Tania Pardo, na que participaron os equipos directivos, representantes dos departamentos de orientación e profesorado de pedagoxía terapéutica dos centros de educación primaria das Pontes, representantes da escola infantil, persoal técnico do Concello e profesionais do programa de atención temperá, entre os que se atopan a logopeda, psicóloga e terapeuta ocupacional.
O obxectivo principal deste encontro foi informar sobre o funcionamento do programa de atención temperá e destacar a importancia dunha coordinación estreita entre os centros educativos, o servizo de pediatría e os servizos sociais. Esta colaboración é fundamental para detectar as necesidades dos menores de 0 a 6 anos e facer as derivacións oportunas ao servizo, garantindo unha atención rápida e eficaz.
Durante a reunión, ademais de presentar os protocolos de derivación e o equipo profesional que conforma o servizo, abordáronse as dúbidas e suxerencias dos asistentes co fin de continuar mellorando esta prestación fundamental para o desenvolvemento infantil.
O programa de atención temperá do Concello das Pontes, financiado pola Consellería de Política Social e o Fondo Social Europeo, está dirixido a nenos e nenas de entre 0 e 6 anos e ás súas familias, prestando servizos individualizados de logopedia, terapia ocupacional e psicoloxía. Segundo explicou a concelleira Tania Pardo, “o programa permite ofrecer unha atención integral nun momento clave do desenvolvemento psicomotriz da infancia, para que adquiran habilidades básicas como falar, moverse ou identificar a outras persoas, potenciando as súas capacidades e favorecendo a integración na súa contorna.”
No ámbito da logopedia, trabállase na comunicación e as súas alteracións para mellorar a linguaxe, a fala, a voz e a deglución. Pola súa banda, a terapia ocupacional céntrase nos aspectos relacionais, lúdicos e funcionais, mentres que o servizo de psicoloxía ofrece unha atención integral que abarca os ámbitos cognitivo, social, emocional, motor, condutual e comunicativo.
O acceso ao servizo realízase a través da área de Pedagoxía do departamento de Benestar Social, que valora e determina a inclusión dos menores no programa. Este encontro reflicte o compromiso do Concello das Pontes para garantir unha atención de calidade que contribúa ao desenvolvemento óptimo dos menores e ao benestar das súas familias.
