Galicia Ártabra Digital Noticias de Ferrol y la comarca de Ferrolterra.
Con motivo do Día do orgullo neofalante (1 de outubro), unha celebración destinada a gañar novos falantes e espazos para a lingua galega, o Concello de Neda impulsa esta semana varias actividades especiais destinadas por unha parte á mocidade e por outra aos máis pequenos da casa.
A primeira cita desta programación, que conta co apoio da Consellería de Cultura, Lingua e Xuventude, chegará o martes 30 de setembro ao IES Fernando Esquío. O centro educativo será o escenario do faladoiro e concerto didáctico “35 anos de música en galego. A culpa foi da lingua”, a cargo de Xosé Bocixa, Paco Cerdeira e Laura Romero de Zënzar, banda de rock en galego que máis anos leva nos escenarios de maneira ininterrompida. A proposta pretende descubrir ao alumnado de secundaria a importancia da lingua como elemento imprescindible na cultura.
E o sábado, a partir das 12:00 horas, será a quenda dos máis pequenos e pequenas da casa, co contacontos de Raquel Queizás “Seguimos medrando en galego con Nano”. Un espectáculo de narración oral, monicreques e obxectos, destinado ao público infantil de 1 a 4 anos. A cita será na Biblioteca municipal, a partir das 12 horas, e haberá que apuntarse con anterioridade, chamando ao 981390233, no horario habitual de apertura (luns a venres, de 9:00 a 13:00 e de 17:00 a 20:00 horas).
Co Día do orgullo neofalante, que conmemora o nacemento do cantautor ferrolán Andrés do Barro, primeiro artista que conseguiu un éxito de masas en España cantando en galego, búscase fomentar nas xeracións máis novas actitudes favorables á lingua galega que contribúan ao seu uso.
