A mesa local de saúde de Ares impulsa unha campaña de fotoprotección

Durante este período estival, a Mesa Local de Saúde aresá, na que se atopan diferentes axentes vencellados coa promoción de hábitos saudables, entre eles o Concello, impulsa unha campaña de fotoprotección contra o sol para lembrar a relevancia de botarse cremanon só nas praias, tamén en calquera evento, espazo exterior ou acto ao que se vaia.

Así, baixo a coordinación da Rede Galega de Promoción da Saúde (REGAPS), desprégase unha campaña cun enfoque transversal: terá impacto nos campamentos deportivos municipais e as actividades do Concello ao aire libre, mais tamén chegará a centros educativos a asociacións locais.

Contará cunha dimensión informativa, dando a coñecer os múltiples tipos de cremas solares que hai segundo a actividade (na auga, con suor, con exposición directa…) e achegando pautas de coidado nestas datas de altas temperaturas, entre elas roupa adecuada  incluíndo gafas e gorras–, prestar atención ás horas de exposición ao sol e moita hidratación.

A maiores, instalaranse dispensadores de crema solar totalmente de balde nos eventos municipais, facilitando o acceso da veciñanza á protección, e tamén se repartirá nos campamentos deportivos da concellaría de Deportes, así como nas actividades que presenten unha exposición ao sol considerable.

Toda esta iniciativa de concienciación é resultado das dinámicas establecidas na Mesa Local de Saúde de Ares, constituída en febreiro deste ano, e que xa realizou os primeiros pasos de diagnose e deseño de propostas para o municipio. Na Mesa participan axentes chave como o Concello, o centro de saúde, centros educativos, clubes deportivos, asociacións locais e outros axentes da localidade con relevancia na promoción da saúde.

Neste #VeraneAres2025 non quedes sen protexerte: bota crema solar!