Xosé Manuel Méndez Rodríguez “Pitelos” inaugura en Valdoviño unha exposición de pintura

A Casa da Cultura de Valdoviño acolle este venres 4 a inauguración dunha mostra pictórica de Xosé Manuel Méndez Rodríguez, «Pitelos». O acto, aberto á veciñanza, iniciarase ás 19:30 horas, coa presenza do autor, e a partir de entón poderá visitarse ata o 31 de xullo de luns a venres de 10:00 a 13:00 horas. A expo recolle unha escolma dos traballos máis recentes do polifacético artista compostelán no ámbito da pintura.

Méndez Rodríguez comeza a súa traxectoria hai máis de 50 anos, realizando a súa primeira exposición de pintura en 1972. Neses primeiros momentos participa de experiencias no mundo da pintura, escultura, fotografía… incorporándose nos 80 ao sector audiovisual, do cine, teatro, danza e ópera. En 2002 regresa á pintura por medio da actualización de pasaxes mitolóxicas gregas trasladadas a espazos actuais.

As súas mostras máis representativas dos últimos anos son “Consolart”, serie na que pon un pé na escultura; “Míticos no Leito”, con oitenta composicións nas que diversos profesionais do audiovisual galego posan coma persoeiros da mitoloxía grega, e “Retratos con Alegoría”, dúas mostras realizadas baseadas en representacións alegóricas recopiadas por Cesare Rippa no Renacemento.

A estas súmanse “Senti2”, un macro retablo con figuras alegóricas de gran formato representando os 5 sentidos; “Ovo Voandeiro” e “Constelatio”.