Psoe Ferrol denuncia que a cidade «queda fora das axudas climáticas»

Os socialistas afirman «que xa preguntaron na comisión de Medio Ambiente pola solicitude destas axudas sen obter resposta do goberno local». Germán Costoya: “O goberno local nin traballa nin responde; Ferrol perdeu fondos clave por pura desidia”.

O Grupo Municipal Socialista denuncia «a exclusión de Ferrol da resolución definitiva das axudas do programa Galicia refuxio climático, publicada no Diario Oficial de Galicia o 13 de maio, e esixe ao goberno local que aclare se, como todo apunta, nin sequera presentou solicitude para optar a estas subvencións».

«A convocatoria, dotada con 2 millóns de euros, permitía que os concellos presentasen ata tres proxectos por un importe máximo de 60.000 € cada un. Ferrol perdeu así a posibilidade de obter ata 180.000 euros en investimentos para mellorar os seus espazos urbanos».

«As actuacións subvencionables incluían, entre outras, sombreado natural de rúas e prazas con especies autóctonas, creación de microclimas urbanos con láminas de auga, instalación de xardíns verticais e cubertas verdes, recuperación de zonas húmidas, restauración de treitos urbanos de ríos, mellora da conectividade entre espazos verdes urbanos e periurbanos. Concellos como Pontevedra, Carballo, Allariz ou Ares si resultaron beneficiarios, mentres que Ferrol non aparece en ningún dos expedientes publicados».

“Se o goberno local nin sequera presentou unha solicitude, estaríamos ante unha deixación de funcións gravísima. Perder financiamento é grave; perder financiamento por non facer nada é directamente imperdoable”, advirte Germán Costoya, concelleiro socialista. Lembra tamén que «xa preguntou na comisión de Medio Ambiente se o Concello tiña previsto optar a estas axudas, sen obter resposta por parte do executivo local».

«Con maioría absoluta e 11 asesores, o goberno municipal segue sen planificar  nin aproveitar oportunidades, mentres impón un modelo de cidade centrado nos coches, na tala de árbores e sen políticas reais de renaturalización urbana. “Temos un alcalde ausente, máis preocupado polo Senado que pola cidade que debería gobernar. E temos un goberno que non traballa, que non planifica e que deixa pasar convocatorias deseñadas precisamente para urbes como Ferrol”, afirmou.

Desde o Grupo Socialista reclámase «transparencia inmediata: que o alcalde explique se se presentou solicitude e, se non foi así, quen asumirá responsabilidades por esta nova oportunidade perdida. “Ferrol non pode permitirse máis erros nin máis escusas. O que falta aquí é traballo, compromiso e un proxecto de cidade pensado nas persoas. Dende que goberna Rey Varela en Ferrol hai cada día máis coches e nas rúas menos árbores”.