Protagonistas da emigración galega relatarán en As Pontes a historia detrás da mostra fotográfica «Nós tamén fomos emigrantes»

Socios voluntarios do Espazo +60 Afundación de Viveiro, emigrantes retornados, contarán este xoves 21 a estudantes do IES Castro da Uz das Pontes de García Rodríguez as historias que están detrás das fotos que conforman a exposición «Nós tamén fomos emigrantes. Fotografías da Axencia EFE sobre a emigración española no século XX».

A iniciativa forma parte do programa «O valor da experiencia», de Afundación, que ten como obxectivo ampliar as posibilidades de participación e contribución das persoas maiores á colectividade, aproveitando o seu talento e coñecementos vitais e profesionais. A mostra é parte do proxecto «Corrente cultural», que impulsa a capilaridade da cultura en Galicia, ampliando as propostas alén das sedes de Afundación e ABANCA e que nesta ocasión se desenvolve en colaboración co Concello de Samos.

Na inauguración e visita guiada, que será no Edificio de Usos Múltiples Casa Doutor Dopeso, estarán, ademais das persoas voluntarias do Espazo +60 Afundación de Viveiro, Vicenta Taladrid, María Luisa Labayén e María Jesús Vargas, e dos 30 estudantes de 3º de ESO do IES Castro da Uz, a concelleira de Cultura, Xuventude, Innovación e Novas Tecnoloxías do Concello das Pontes de García Rodríguez, Lorena Tenreiro; o coordinador institucional de ABANCA na Coruña, José Manuel Vilariño; a directora de zona de ABANCA, Begoña Caamaño; a directora da oficina ABANCA das Pontes, Laura Valiño; a coordinadora de Relacións Institucionais de ABANCA, Verónica Rego; o coordinador do Espazo +60 Afundación de Santiago de Compostela, Álvaro Álvarez; e a coordinadora do Espazo +60 Afundación de Viveiro, Cristina Goas.

A exposición recolle unha selección de corenta fotografías da emigración, tanto española como galega, procedentes dos arquivos da Axencia EFE. O obxectivo é tratar de achegarnos a esa realidade histórica a través dunha síntese fotográfica das migracións mediante a mirada profesional e humana dos fotoxornalistas da época. Quedará exposta ao público no Edificio de Usos Múltiples Casa Doutor Dopeso das Pontes ata o vindeiro 20 de abril.