A Deputación da Coruña destina 792.000€ para o persoal das oficinas municipais de turismo

Os 55 concellos beneficiarios, de menos de 50.000 habitantes, recibirán subvencións de entre 10.000 e 20.000 euros. “Con esta liña de axudas seguimos a reforzar a capacidade dos concellos para ofrecer un servizo turístico de calidade, garantindo unha atención profesionalizada que contribúa á promoción dos nosos recursos naturais, culturais e patrimoniais”, destaca o vicepresidente Xosé Regueira.

Cincuenta e cinco municipios coruñeses  repartirán os 792.039 euros que a Deputación investirá no programa  DP0029, dirixido aos concellos e agrupacións de concellos da provincia de menos de 50.000 habitantes para o financiamento do gasto de persoal das oficinas de turismo durante 2025. Os beneficiarios recibirán axudas de entre 10.000 e 20.000 euros.

“Con esta liña de axudas seguimos a reforzar a capacidade dos concellos para ofrecer un servizo turístico de calidade, garantindo durante todo o ano unha atención profesionalizada que contribúa á promoción dos nosos recursos naturais, culturais e patrimoniais, mellorando a experiencia dos visitantes e fortalecendo o sector en toda a provincia”, destaca o vicepresidente Xosé Regueira.

Segundo Regueira, “o turismo é un eixo estratéxico para a creación de emprego e a cohesión territorial, e estas axudas permitirán aos concellos máis pequenos manter equipos cualificados sen comprometer os seus orzamentos». O vicepresidente subliñou que o programa de subvencións “responde a un compromiso coa equidade territorial, xa que facilita que mesmo os municipios con menos recursos poidan competir nun sector clave para a economía provincial”.

«Co programa DP0029”, rematou, “non só garantimos servizos turísticos de calidade, senón que tamén favorecemos a creación e consolidación de postos de traballo. Apostamos por un turismo xestionado de forma profesional e sostible, con información accesible e adaptada ás necesidades de cada territorio».

A relación dos concellos beneficiarios pode consultarse e descargarse no BOP do 14 de marzo.