Ares promove unha campaña de concienciación sobre a recollida de deposicións dos cans

A edil de Medioambiente de Ares, Lucía Blanco, presentou este semana no consistorio a campaña que organizará nas vindeiras semanas na localidade dende a súa área de traballo, unha iniciativa de concienciación dos propietarios de mascotas para fomentar a limpeza de deposicións dos cans nos espazos públicos.

Co foco posto en mellorar a convivencia entre a veciñanza e a promoción de boas condutas, o Concello repartirá dende o martes, 4 de marzo, preto de 400 dispensadores de bolsas para a recollida dos excrementos das mascotas totalmente de balde, dispoñibles na entrada do consistorio aresán.

A campaña, que xa tivo unha primeira edición na lexislatura pasada por parte da Concellaría de Medioambiente con outro reparto de dispensadores de bolsas e a colocación de cartelería pola vila, implicará a maiores a produción e difusión de contidos nas redes sociais da institución con mensaxes centrados na sensibilización da veciñanza no tocante ó coidado das rúas e parques de Ares.

Lucía Blanco tamén presentou estas creatividades gráficas e salientou que a iniciativa “pretende contribuír á mellora desta problemática e á convivencia dos nosos veciños e veciñas, tendo en conta que é un acto obrigatorio de limpeza e seguridade en Ares, e así se estipulou na ordenanza municipal que impulsamos en 2020”.