As Pontes contará cun clube de saúde para enfermos de cancro e as súas familias

A iniciativa incluirá talleres e sesións sobre saúde física nutrición ou habilidades emocionais.

O Concello das Pontes e a Asociación Española Contra o Cancro van poñer en marcha un clube para mellorar a saúde integral de persoas afectadas por esta enfermidade, familiares e superviventes.

A iniciativa ten como obxectivo facilitar o acceso a recursos de saúde integral a pacientes e coidadores foi presentada o martes 25 da man da propia Xunta Provincial da Coruña da Asociación Española Contra o Cancro (AECC), nun encontro que estivo presidido polo alcalde Valentín González Formoso e a edil de Benestar Social, Tania Pardo, e no que tamén participaron representantes da Xunta Local das Pontes da propia AECC.

O primeiro edil agradeceu que a asociación pensase nas Pontes como nova localización deste interesante proxecto piloto e que, xa o pasado ano, se poñía en marcha con moi bos resultados nos concellos de Cedeira, Melide e Vimianzo.

Valentín González Formoso quixo respaldar unha iniciativa que, ao seu xuízo, será permite abordar a enfermidade dende outros puntos de vista, máis aló dos médicos e farmacolóxicos, xa que tal e como recalcou é necesario traballar na nutrición, en pautas de exercicio físico ou en ferramentas para fomentar unha boa saúde mental, entre as persoas que sofren esta doenza.

Neste senso, Formoso apuntou que o concello das Pontes ofreceu toda a súa colaboración para a posta en marcha deste proxecto que a mediados do mes de marzo, está previsto que se presente nun acto público. Asemade, o alcalde pontés animou a veciños e veciñas a sumarse a este club de saúde que, de seguro, tamén vai lograr unha acollida moi positiva entre ponteses e pontesas.

Pola súa parte a Coordinadora de Desenvolvemento Territorial da Xunta Provincial da Coruña da Asociación Española Contra o Cancro, Rocío García de la Barga, explicou que este tipo de clubs o que buscan é non falar de cancro, senón do resto de temas que rodean ás persoas enfermas e coidadoras.

Segundo apuntou, este novo club de saúde busca ofrecer un espazo no que persoas enfermas e coidadoras compartan experiencias, á marxe de temas que xa tratan cos seus equipos médicos. Un entorno no que socializar, empatizar e compartir experiencias propias con outros veciños que están a pasar pola mesma situación.

En canto a este novo espazo, está previsto que inclúa 21 sesións, dunha hora de duración, que serán semanais a desenvolver no Centro de Saúde das Pontes da man dun equipo de profesionais especializados e persoas voluntarias.