Neda conmemora o Día de Rosalía con actividades varias e a acción “Pan e poesía”

O Concello de Neda súmase esta semana á conmemoración do Día de Rosalía (23 de febreiro, coincidindo co día do seu nacemento), destinado a dar a coñecer a figura e a obra da para pór en valor a figura e a obra da poetisa máis recoñecida das letras galegas. E faino cunha programación especial na biblioteca municipal. Unha oferta que incluirá actividades para o público en xeral e para a xente miúda. E como colofón, a iniciativa “Pan e poesía”.

A oferta arrinca este xoves 20 cun obradoiro de caligramas e unha sesión de xogos de mesa, dirixida a nenos de Neda de seis anos en diante. A proposta, titulada “E quen vén sendo Rosalía?”, terá lugar a partir das 18 horas, no espazo cultural municipal.

Para o venres 21, a partir das 18.30 horas, prepárase unha lectura colectiva de poemas da autora de Cantares gallegos, Follas novas o En las orillas del Sar. Unha iniciativa aberta ao conxunto da cidadanía. De feito, dende o Concello faise unha chamada á participación. E solicitan ás persoas que desexen colaborar en “Unha tarde con Rosalía”, que contacten coa biblioteca (teléfono 981390233).

A programación continuará o sábado co espectáculo infantil de narración oral “Historias soñadas”. A obra de Trémola Teatro está inspirada nos versos e tamén en anacos da vida desta escritora do Rexurdimento. A proposta, que mestura poesía e música, para nenos de máis de tres anos, está fixada para as 12 horas. Está incluída no programa cultural “Lesme un conto?”.

Pan e poesía

Finalmente, o domingo, o Concello desenvolverá, coa colaboración de panaderías locais, a acción “Pan e poesía”. Así, as primeiras persoas que se acheguen a mercar o pan, emblema gastronómico de Neda, aos despachos existentes na vila recibirán, a modo de agasallo, un marcapáxinas cun poema da autora. Unha forma de espallar o coñecemento sobre a poetisa máis célebre da nosa lingua.