Galicia Ártabra Digital Noticias de Ferrol y la comarca de Ferrolterra.
Psoe Ferrol afirma que «a falta de vontade política e de liderado do alcalde obriga ao club insignia da cidade a levar a súa cidade deportiva a outro municipio»
Psoe Ferrol a través dun comunicado afirma que «a xestión deficiente do goberno municipal liderado por Rey Varela levou a que o Racing de Ferrol, o club máis representativo da nosa cidade, teña que construír a súa cidade deportiva fóra dos límites municipais. Esta decisión supón un golpe á identidade deportiva de Ferrol e evidencia a incapacidade do Partido Popular para impulsar proxectos cruciais para o desenvolvemento da cidade».
«Desde hai meses, o Racing formulaba a necesidade dun espazo adecuado para desenvolver a súa cidade deportiva, unha infraestrutura clave para o futuro do club e o deporte base na comarca. Porén, a falta de interese e a incapacidade do goberno municipal para ofrecer unha alternativa viable levaron á entidade a buscar solucións noutros municipios».
«Ferrol dispoñía de opcións perfectamente viables, como A Malata ou Mougá. Con todo, a desidia e a falta de liderado político fixeron que se desaproveitase unha oportunidade histórica. Unha cidade coa tradición e o potencial deportivo de Ferrol non pode permitirse perder un dos seus buques insignia».
«A saída do Racing para construír esta infraestrutura supón tamén unha perda para Ferrol como cidade, que deixa escapar unha oportunidade para atraer investimento, fortalecer o vínculo co club e fomentar o deporte entre a mocidade».
O Grupo Municipal Socialista esixe ao goberno do Partido Popular «que explique como se chegou a esta situación e que medidas pensa tomar para evitar que Ferrol siga perdendo proxectos estratéxicos. Esta situación é un claro reflexo da falta de liderado e visión de Rey Varela, que continúa prexudicando gravemente a cidade e aos seus veciños».
«Ferrol e o Racing merecen máis. Non é tempo de escusas, senón de asumir responsabilidades» conclúe o grupo municipal socialista
