O Concello de Ares e a editorial Hércules de Ediciones convocan a terceira edición do Premio Novela Curta Alén

A concelleira de Cultura de Ares, Alma Barrón, e a directora de Hércules de Ediciones, Laura Rodríguez, presentaron conxuntamente o III Premio Novela Curta Alén Concello de Ares, o certame da institución aresá co foco posto na narración literaria do proceso migratorio en toda a súa complexidade.

No acto de presentación celebrado na mañá deste martes, día 15,na casa consistorial debulláronse as bases de participación no premio, que ten como obxectivo principal o fomento da creación literario e a celebración da riqueza cultural da emigración e literatura de Galicia, promovendo un espazo de recoñecemento das obras escritas en lingua galega.

Así, Alma Barrón subliñou “a aposta firme por contribuír á conservación e entendemento da memoria da migración, sabendo que en Ares precisabamos un certame literario que permitise construír, coa colaboración de
Hércules de Ediciones para a súa publicación e difusión, unha colección de historias con esa liña de traballo”.

Pola súa banda, Laura Rodríguez resaltou “a importancia deste premio literario para achegar aos lectores historias sobre a nosa emigración e descubrir novos talentos na literatura en lingua galega»

Como galardón, o Alén contempla unha dotación económica que ascende a 2.000 euros, amais da publicación da novela gañadora no catálogo de Hércules de Ediciones, deseñando así unha colección narrativa que olla a migración con profundidade, divulgando o seu compoñente máis emocional e social: como se sinte alguén que migra, que deixa ao seu redor e atrás, a que se debe afrontar e como se transformou ao longo do tempo.