Narón conta con tres novos axentes da Policía Local

A alcaldesa da cidade, Marián Ferreiro, recibiu na última semana aos tres novos axentes que forman xa parte do plantel da Policía Local. O acto, que tivo lugar na Alcaldía, contou tamén coa presencia, entre outros, do concelleiro de Seguridade Cidadá, José Oreona, e o xefe da Policía Local de Narón, Eduardo Pita.

A finais da semana pasada tomou posesión da praza Daniel Bustabad Santiago, que procedente de Sada, incorpórase ao Corpo na cidade a través dun procedemento de mobilidade. Esta semana incorporáronse Marcos Piñón Hermida e Manuel Antonio Escudero Hernández, tras realizar o curso teórico da Academia Galega de Seguridade Pública (Agasp) e rematar o pertinente período de prácticas, que levaron a cabo na cidade.

Ferreiro deulles a benvida aos tres novos axentes trala toma de posesión e interesouse polo seu período formativo e tamén polas prácticas, así como pola experiencia do que se incorpora procedente do Concello de Sada. Coa chegada destes tres novos funcionarios de carreira a Policía Local de Narón queda integrada por un total de 39 axentes, tal e como apuntou a alcaldesa da cidade.