Galicia Ártabra Digital Noticias de Ferrol y la comarca de Ferrolterra.
O concelleiro socialista ferrolano Julián Reina reclama «seriedade» e «profesionalidade» nas «escasas obras de mantemento da cidade que está a executar o goberno de Rey Varela e, a modo de exenpo, o edil citou os traballos na praza de España».
A este respecto, Reina lembrou «que o pasado 16 de xuño, o grupo socialista solicitara a reparación de todos os viais da praza de España (incluindo o túnel que une a avenida do Rei coa avenida de Vigo), xa que naquel momento o alcalde unicamente pensaba intervir nos viais que unen a praza do Callao coa estrada de Castela e esta última coa rúa do Sol».
«E daquela», continúa o edil socialista, «pediuse ao goberno do PP que a intervención se executara aproveitando o período vacacional, para que non dificultara o tráfico no inicio de curso escolar».
Finalmente, «nin se rematou a obra antes do inicio de curso, nin está rematada a día de hoxe». «Ademais, o firme renovouse, pero non está pintado nin correctamente sinalizando que a estrada se encontra sin pintar, o que supón un risco de posibles accidentes porque, a maiores, o vial é moi estreito», engadiu Julián Reina.
Finalmente, o concelleiro do PSdeG-PSOE subliñou que «continúa pendente a reparación dos outros viais que conectan o barrio da Magdalena coa estrada de Castela, «que presentan numerosas fochancas nas que cabería a roda dun coche», afirmou.
«Esta intervención, en definitiva, é un exemplo perfecto da falta de interese de Rey Varela co día a día da nosa cidade, e a súa total falta de compromiso con Ferrol», concluíu Reina.
