Galicia Ártabra Digital Noticias de Ferrol y la comarca de Ferrolterra.
A Deputación da Coruña reuniuse co goberno municipal de Monfero para coñecer as necesidades e demandas do municipio en materia de seguridade vial nas estradas de titularidade provincial.
Na reunión de traballo participaron a deputada de Vías e Obras, Mónica Rodríguez, o portavoz do Goberno provincial, Bernardo Fernández e o alcalde en funcións de Monfero, Alberto Cortizas, xunto con técnicos do departamento provincial de estradas.
No encontro, Albero Cortizas demandou actuacións de mellora da seguridade de dúas estradas provinciais, a DP 5001 de O Carballiño á Curra polo alto de Xestoso e a DP 5002 de A Pila da Leña a Lagares. Ambas as dúas estradas teñen actualmente anchos non superiores aos catro metros.
A deputada de Vías e Obras anunciou que o seu departamento encargará un proxecto para levar a cabo a ampliación da estrada DP 5001 ata os sete metros de ancho, co obxectivo de garantir o cruce de dous vehículos en condicións de seguridade, e porá en marcha a execución de sobreanchos en distintas zonas da DP 5022 para mellorar tamén a seguridade da circulación de vehículos.
Os levantamentos topográficos para as obras comezarán nas vindeiras semanas. Ambas actuacións incluirán a renovación do firme.
