Entrega en Narón dos diplomas do itinerario formativo de Prevención de Riscos laborais

A concelleira de Formación de Narón, Natalia Hermida, entregou os diplomas aos dezaoito alumnos que realizaron o itinerario formativo de Prevención de riscos laborais, Prevención de riscos laborais e medio ambiente no sector naval e Prevención de riscos laborais en espazos confinados e traballos en altura.

A acción enmarcouse no Programa Municipal de Formación e impartiuse nas instalacións do centro Irmás Froilaz, na Gándara, entre os meses de xullo e agosto deste ano.

A edil naronesa recordou que o curso, dirixido a persoas desempregadas de Narón, ofreceu formación sobre seguridade no traballo, riscos xerais e a súa prevención no sector correspondente á actividade das empresas. Incluíu ademáis módulos transversais de Igualdade de oportunidades, emprendemento e orientación laboral e búsqueda de emprego.

Hermida destacou a importancia do Programa municipal de Formación, “único na comarca, con cursos ao longo de todo o ano en diferentes familias profesionais, cun obxectivo, que é a inserción laboral das persoas desempregadas”.

Ademáis, recordou ao alumnado deste itinerario “os diferentes servizos que se ofrecen dende a área de Formación, recollidos no tríptico Conectados polo emprego –que se pode consultar a través da web municipal no enlace: https://naron.gal/web/docs/triptico_emprego.pdf-, como son a intermediación laboral, orientación laboral, formación e emprendemento”.