Formoso clausura os campamentos deportivos da Deputación nos que participaron 500 nenos

Cincocentos nenos entre os 9 e os 14 anos procedentes dos 93 concellos coruñeses gozaron durante o mes de xullo dos campamentos deportivos de verán organizados pola Deputación da Coruña na residencia do IES Rosalía Mera, na cidade herculina.

O presidente da Deputación, Valentín González Formoso, despediu en Dexo (Oleiros) aos participantes na derradeira quenda dos campamentos.

Formoso destacou que a rapazada “gozou dun amplo programa de actividades, tanto deportivas como culturais e de ocio, pero sobre todo do máis importante, que é facer amigos e compartir vivencias”. O presidente desexou un bo verán aos participantes e felicitou aos monitores encargados do coidado dos cativos polo traballo desenvolvido.

Nesta última semana participaron nenos dos concellos de Ares, Cariño, Cedeira, Cerdido, A Coruña, Moeche, Monfero, Narón, Neda, Ortigueira, San Sadurniño, As Somozas e Valdoviño.

Durante todo o mes de xullo, os rapaces tiveron a oportunidade de participar en actividades náuticas, practicar tenis, fútbol, baloncesto, natación ou sendeirismo; así como gozar dun paseo en barco pola ría da Coruña e visitar lugares de interese coma a Torre de Hércules, a Casa dos Peixes, o xardín de San Carlos, ou castelo de San Antón.