Concurso de Saltos Nacional*** Cidade de Ferrol e competicións hípicas Equiocio Ferrol

Equiocio Ferrol activa as inscricións para a totalidade das competicións hípicas da súa próxima edición, que se celebrará en Covas, do 1 ao 4 de agosto. O prato forte volverá ser o Concurso de Saltos Nacional*** Cidade de Ferrol, pero refórzase tamén a competición de ponis. Así, o CSNP1 formará parte da Liga de Norte a Sur.

Ata o próximo 23 de xullo está aberto, a través da web da Real Federación Hípica Española (RFHE), o prazo para anotarse nos distintos concursos nacionais que se disputarán na pista central de herba natural de Equiocio Ferrol.

A competición estrela será, un ano máis, o CSN*** Cidade de Ferrol, único desta categoría no calendario de competicións galego. En total, incluirá doce probas oficiais sobre alturas de 1,10; 1,20; 1,30; 1,35 e 1,40 metros, e cun máximo de tres cabalos por deportista. O concurso repartirá algo máis de 18.000 euros en premios.

Desde a organización destacan o interese espertado por esta cita, con solicitudes de información de clubs de distintos puntos do país e tamén do veciño Portugal. Xa están anotados preto dunha trintena de cabalos e, na nómina provisional de rexistrados figuran nomes como o de Álvaro Gil ou Javier González Fraga, gañadores do Gran Premio nos últimos anos.

Ponis

En canto á competición de ponis, cómpre destacar que o Concurso de Saltos Nacional de Ponis (CSNP1),  inscrición na web da RFHE,  volverá ser valedoiro para a Copa Campeones. Ademais, Equiocio Ferrol será un dos piares da expansión polo Norte da península da liga de Norte a Sur. Así, será unha das once probas puntuables da terceira edición deste proxecto.

Segundo o avance do programa, o concurso constará de 24 probas oficiais repartidas en oito categorías, sobre alturas que irán dos 0,50 aos 1,15 metros.

En función da categoría, poderán participar xinetes e amazonas de entre 6 e 16 anos, establecéndose, como no concurso de adultos, un máximo de tres cabalos por deportista.

Probas territoriais

Finalmente, a oferta deportiva completarase coas distintas probas do Concurso de Saltos Territorial (alturas de 0,80, 1, e 1,10 metros) As inscricións neste último concurso, complementario da competición nacional, xestionaranse directamente co comité organizador a través do correo electrónico secretaria@equiocio.es.

A oferta deportiva de Equiocio Ferrol 2024 contará entre os seus principais patrocinadores coa Xunta de Galicia, Turismo de Galicia, Concello de Ferrol, Deputación da Coruña, Estrella Galicia e Gadis. Colaboran ademais Fundación Deporte Galego, Federación Hípica Galega, J Rilo, Pavo e, como non, a Comunidade de Montes veciñais en man común de Covas e Esmelle.