Galicia Ártabra Digital Noticias de Ferrol y la comarca de Ferrolterra.
O Bloque Nacionalista Galego de Ferrol considera que «o goberno local de Ferrol volve a desprezar á comunidade escolar municipal e lamenta que unha vez máis non se teña convocado neste final de curso o Consello Escolar Municipal».
María López, concelleira do BNG, salienta que «a pesar das reiteradas peticións do noso grupo para a convocatoria de xeito urxente e extraordinario do Consello Escolar Municipal, este goberno decidiu unha vez máis deixalo para setembro segundo se nos informou na pasada comisión de Educación, e onde estivemos esperando dende a semana pasada onde a concelleira informou que se ía convocar a primeiros de mes».
«No BNG entendemos que se ben as datas non son as máis idóneas, o certo é que o Consello Escolar xa se tiña que ter convocado con anterioridade, debido a problemática que hai cos comedores, cuns pregos que nunca foron mostrados a este órgano de participación».
María López anota tamén «a necesidade de abordar a situación dos colexios da cidade sobre a situación da matriculación onde quedaban crianzas a espera de ser admitidas e sen poder matricularse, e da que aínda a concelleira non informou sobre se xa estaba arranxado ese problema, como no caso do CEIP A Laxe que levamos ao pleno do pasado mes de xuño».
«Cremos que estas dúas problemáticas teñen a suficiente entidade para que a comunidade educativa do concello de Ferrol tivera podido valorar e enfocar estes problemas para darlles unha solución».
«Por iso é que lamentamos que unha vez máis este goberno non lle dea valor nin voz aos entes participativos deste concello, como é o Consello Escolar Municipal, é temos que esperar ate setembro para falar destes temas no consello».
