Galicia Ártabra Digital Noticias de Ferrol y la comarca de Ferrolterra.
O primeiro sábado do mes de xullo está marcado no calendario desde hai varios anos como a data en que, si ou si, hai que ir bota-lo día e parte da noite á beira do río Castro para gozar das actividades e dos concertos do festival organizado pola A.VV. O Castelo de Narahío, en San Sadurniño.
O programa deste 2024 mantén a orde de todos os anteriores, propoñéndonos unha sesión vermú ao mediodía, xogos e un espectáculo para a rapazada pola tarde, deportes rurais á tardiña e música pola noite. Na presente edición, que fai a 29ª, veñen Vai Rañala Meu!, Teatro Ghazafelhos, Tres Pesos, Encrucillada, Os Viqueiras e, pechando a noite, A Requinta da Laxeira. O XXIX Festival do Río Castro conta con financiamento da Deputación da Coruña e tamén coa colaboración do Concello de San Sadurniño.
Esta é a descrición que aparece na páxina web do «mellor festival do mundo mundial», onde xa hai varias semanas que pode consultarse o cartel deseñado por Juanlu Nacha con todo o que vai haber este sábado 6 de xullo no lugar da Bóla, ao pé da ponte medieval da Ferraría.
No serán -sobre as 18:00 ou 18 :30 horas – desenvolverase un dos momentos máis intensos da xornada cos campionatos de serrado con tronzador e tiro á corda, que desde hai varios festivais se disputan sempre en equipos con paridade de xénero. Os xogos adoitan estirarse ata practicamente o comezo dos concertos nocturnos, previsto para as 22:00 horas.Apoio da Deputación e do Concello
O XXIX Festival do Río Castro conta cun orzamento próximo aos 16.000€, sufragados con fondos da AVV O Castelo de Narahío e con achegas económicas da Deputación da Coruña e do Concello de San Sadurniño. Tamén colaboran a agrupación de Protección Civil de Narón -na coordinación do tráfico e das zonas de aparcadoiro- e unha chea de veciñas e veciños que ceden terreos e que botan unha man na loxística organizativa
