133 mulleres reuníronse na primeira xuntanza de mulleres de Magalofes

A iniciativa xurdiu o pasado 12 de maio co motivo da presentación da bandeira de Magalofes e a homenaxe á primeira directiva da AA.VV. San Xurxo de Magalofes (12/03/1978). Virginia Pérez Permuy e Belén Souto Calvete decidiron xuntar a todas as mulleres que viven en Magalofes e as que non viven e seguen sentídose de aí. En pouco máis dun mes esta idea converteuse en realidade.

A dita xuntanza celebrada o pasado sábado reuniu a 133 mulleres de todas as idades, dende Irene a máis nova con 15 anos ata Chucha con 91. Reuniu a irmás que había anos que non se vían, amigas da infancia…

A xornada comezou cun xantar, seguido dun cuarteto de rapazas que deleitaron con música tradicional galega, houbo sorteos, música e baile e tamén lembranza para as mulleres de Magalofes que xa non están entre nós. Un dos momentos máis emotivos foi escoitar a todas as mulleres cantar unha canción que fala da amizade.

A vicepresidenta da asociación Lupe Permuy e a secretaria Bea Paz, agradeceron a Belén e Virginia a súa iniciativa e o labor tan grande que desempeñaron para levar a cabo esta xuntanza, instándoas a que sigan organizandoa nos vindeiros anos. Asemade recalcaron que esta xuntanza vai ter moita repercusión na vida futura da parroquia.

Onte, domingo de resaca emocional, as organizadoras comentan: «comezo a ser consciente do que fixemos«.