A Copa Deputación de Balonmán na Rúa chega a Cedeira

A pista de balonmán instalada na praza da Revolta de Cedeira acolle durante esta fin se semana os partidos da Copa 5×5 Deputación da Coruña, que pretende levar este deporte a nenos de entre 6 e 11 anos dunha forma lúdica e divertida.

O evento, que se celebra en Cedeira tras o seu paso pola cidade da Coruña e os concellos de Negreira, Sada, Zas e Oroso recalará nun total de sete concellos da provincia. O circuíto contará  coa participación de máis de 1.600 deportistas e pretende achegar o deporte do balonmán a todos os públicos e favorecer a práctica desta disciplina deportiva.

No caso de Cedeira, participan un total de 20 equipos e máis dun centenar de nenos.

Na praza da Revolta está xa instalada unha pista de mini-balonmán ao aire libre, con bancadas para 250 persoas para que familias e afeccionados poidan gozar vendo en acción aos máis pequenos.

A pista dispón de marcador electrónico, unha gran pantalla LED, megafonía, speaker e comentaristas e nalgunhas sedes incluso un dron para as tomas aéreas do evento, configurando un gran espectáculo para toda a familia no que os pequenos deportistas son os protagonistas.

A deputada  Rosa Ana García, participará o domingo 16 de xuño ás 13.30 horas, no acto de entrega de medallas e trofeos aos gañadores do evento de Oroso.

 O circuíto rematará a vindeira semana en Ribeira.