Narón abre o prazo de inscrición no programa “Vémonos” dirixido á mocidade

A través deste programa, os participantes realizarán actividades, como caiac, obradoiro LGTBIQ+, karaoke, un reto Steam, scape room, gincana deportiva, misións de Laser Tag, xogos cooperativos, e unha visita ao Aquapark de Cerceda.

O concelleiro de Mocidade, Ibán Santalla, presentando este mércores o programa “Vémonos”.

O concelleiro de Mocidade, Ibán Santalla, presentou na mañá deste mércores o programa “Vémonos”, dirixido a rapazas e rapaces nados entre 2007 e 2011. O edil avanzou que a Casa da Mocidade de Narón acollerá do 8 ao 13 de xullo unha serie de actividades educativas pensadas para menores e informou que se ofrecen dez prazas en quenda libre, quedando outras dez reservadas para persoas derivadas de servizos sociais e con diversidade funcional.

As inscricións abriranse dende mañá xoves ás 8:30 horas ata o 26 de xuño ás 13:00 horas no Rexistro e na Sede Electrónica de Narón e terán preferencia os menores empadroados nesta cidade. No caso de que a demanda de prazas de quenda libre supere á oferta realizarase un sorteo público para adxudicalas.

A través deste programa, en horario de mañá, de 10:00 a 14:00 horas os participantes realizarán varias actividades, como caiac, obradoiro LGTBIQ+, karaoke, un reto Steam, scape room, gincana deportiva, misións de Laser Tag, xogos cooperativos, e unha visita ao Aquapark de Cerceda. Esta última proposta terá lugar o 12 de xullo, día no que o horario será de 10:00 a 17:00 horas, tal e como apuntou o concelleiro naronés.

O edil animou ás mozas e mozos de Narón a inscribirse neste programa municipal, de balde, “co fin de desfrutar de novas experiencias e amizades durante unha semana, realizando actividades moi variadas no ámbito do lecer e tamén actividades de sensibilización na área da Igualdade, da saúde e do medio ambiente”.

Para máis información pódese contactar co Servizo Sociocomunitario Municipal, a través do teléfono 981 337 700 (extensións 1108, 1109 e 1111). O programa está subvencionado polo Ministerio de Igualdade, no marco do programa Plan Corresponsables no ámbito local.

Lea también

O novo PXOM de Narón permanece a exposición pública ata o 16 de agosto

A corporación local de Narón aprobou por unanimidade nunha sesión plenaria celebrada a pasada semana …