O BNG de Ferrol invita ó Goberno local refedinir o proxecto do Sánchez Aguilera

Iván Rivas, portavoz municipal do BNG de Ferrol, afirmou que «co proxecto de urbanización do Sánchez Aguilera estamos diante dunha oportunidade única e que non se repetirá». «Unha oportunidade única que deberiamos aproveitar para facer deste espazo central un gran pulmón verde no mesmo corazón de Ferrol».

Por estes motivos o portavoz nacionalista solicitou ao alcalde da cidade que «reflexione respecto de que futuro quere deixar para a veciñanza». Neste senso o portavoz nacionalista anima a Rey Varela a «redefinir o proxecto de urbanización do Sánchez Aguilera sobre a base dos criterios do urbanismo actual, incrementando a dotación de zonas verdes e abandonando os presupostos anacrónicos de desarrollismo urbano que sustentaron a redacción dun Plan como o do Sánchez Aguilera que propón para este espazo máis de 460 vivendas e un gran centro comercial de 20.000 m^2 «

Iván Rivas, advirte que «o proxecto de urbanización do Sánchez Aguilera correspóndese cun modelo de cidade de hai máis dunha década, que é o momento da súa concepción. Un modelo de cidade anacrónico baseado nos parámetros da burbulla inmobiliaria e que actualmente está superado e non responde aos actuais criterios de sustentabilidade medioambiental e urbana»

«Un modelo de urbanismo do que en Ferrol xa temos exemplos fallidos como o Bertón do que deberiamos aprender. Un proxecto de urbanización que, como o mencionado, leva consigo riscos evidentes produto de que a construción das edificacións non está asociada ao desenvolvemento da urbanización».

Para o BNG esta é «unha operación urbanística baseada no ladrillo e no asfalto cando o que precisa Ferrol non é construír máis senón rehabilitar o que hai xa construído e desenvolver a súa vez grandes zonas verdes que fagan de Ferrol unha cidade moderna e sustentable».

Adxúntase o audio de Iván Rivas, portavoz do BNG de Ferrol