Apertura dunha nova convocatoria do concurso Maria Moliner

A subdelegada do Goberno en A Coruña, María Rivas, informou da apertura dunha nova convocatoria do concurso Maria Moliner ao que poden concorrer os municipios de menos de 50.000 habitantes que conten con biblioteca municipal.

Este concurso, convocado polo Ministerio de Cultura, ten como finalidade impulsar proxectos ou actividades de dinamización lectora que se desenvolvan a través das bibliotecas municipais. A subdelegada animou aos concellos da provincia que cumpran con este dous requisitos a presentar os seus proxectos.

O prazo estará aberto ata o vindeiro 21 de xuño, podendo presentar a solicitude en calquera das linguas oficiais. As entidades locais participantes poderán optar a un premio de 2.777 euros que pode chegar aos 10.000 se son seleccionados entre os 10 mellores da convocatoria.

Na pasada edición presentáronse 562 municipios de toda España, das que foron seleccionadas 370 bibliotecas. Na provincia da Coruña resultaron premiados cinco proxectos, os presentados pola Biblioteca Municipal de Ares, a Biblioteca Pública Municipal Concepción Arenal de Miño, a Biblioteca Municipal Juan Fernández Latorre de Ortigueira, a Biblioteca Municipal Rego da Balsa de Carballo e a Biblioteca Central de Oleiros.

As cinco bibliotecas premiadas puideron destinar o premio á compra de libros ou publicacións periódicas en calquera soporte.

A subdelegada sinalou a importancia de apostar por este tipo de iniciativas, xa que os programas de animación á lectura abren portas á imaxinación, posibilitan a adquisición de información a través de fontes diversas o que reforza as capacidades para conformar unha opinión crítica, ademais de ser un elemento fundamental para a promoción da cultura e o desenvolvemento persoal de todas e todos.

Do mesmo puxo en valor o traballo que se fai dende as bibliotecas municipais, especialmente nos pequenos concellos, xa que son un espazo de socialización da veciñanza, en moitas ocasións un espazo de convivencia interxeneracional, e tamén, un espazo de lecer onde a promoción da cultura e do coñecemento son a base do traballo diario.

As solicitudes poden presentarse a través da sede electrónica do Ministerio de Cultura que, unha vez rematado o prazo de presentación, iniciará o proceso de selección mediante a análise dunha serie de criterios, tendo en conta a claridade e interese do proxecto para a animación lectora, a boa planificación e viabilidade, así como a orixinalidade.

O programa tamén reviste unha gran importancia estratéxica, xa que aproximadamente a metade da poboación española reside en municipios de menos de 50.000 habitantes, polo que a iniciativa ten un gran alcance no conxunto territorio. Na provincia da Coruña poderían presentarse 85 dos 93 concellos, xa que contan con biblioteca municipal e non superan os 50.000 habitantes.